ಜೋಗಿ ರೀಡರ್

ಜೋಗಿ ಕನ್ನಡ ಸಾರಸ್ವತ ಲೋಕದ ವಿಸ್ಮಯ, ಕುಡ್ಲಸೀಮೆಯ ಗಿರೀಶ್ ರಾವ್ ಎಂಬ ಹೆಸರಿನ ಈ ಗೆಳೆಯ ತಮ್ಮ ಪತ್ನಿ ಜ್ಯೋತಿಯ ಹೆಸರನ್ನು ತಮ್ಮ ನಾಮವಾಚಕದೊಂದಿಗೆ ಸಾಂಕೇತಿಕವಾಗಿ ಅಲಂಕರಿಸಿಕೊಂಡವರು, ಆ ಕಾವ್ಯನಾಮದೊಂದಿಗೆ ನಿರಂತರವಾಗಿ ಸವೆಯದೇ ಬರೆಯುತ್ತಿರುವವರು. ಇವರು ಒಂದು ಕಡೆ ನಿಂತವರಲ್ಲ, ಕುಂತವರಂತೂ ಮೊದಲೇ ಅಲ್ಲ. ಈ ಬಹುಪದಿಯ ಸೃಜನಶೀಲ ಕೆಲಸಗಳು ಒಂದಲ್ಲ ಎರಡಲ್ಲ, ಹತ್ತಾರು. ಕಾರಣ ಇವರು ಕವಿ, ಕಥೆಗಾರ, ಕಾದಂಬರಿಕಾರ, ವಾಗ್ಮಿ ಮತ್ತು ಹಲವು ಧಾರವಾಹಿಗಳ ಸ್ಕ್ರಿಪ್ಟ್ ರೈಟರ್, ಅಲ್ಲದೆ ಹಲವು ಪತ್ರಿಕೆಗಳಲ್ಲಿ ರೆಗ್ಯುಲರ್ ಅಂಕಣಕಾರ. ಈ ಎಲ್ಲಾ ಸೃಜನಶೀಲ ಅವತಾರಗಳ ನಡುವೆ ದಣಿವರಿಯದ ಲೇಖಕ ಕೂಡ.

ತಮ್ಮ ಬರಹಗಳಿಂದ ಅಪಾರ ಜನಪ್ರಿಯತೆ ಸಂಪಾದಿಸಿರುವ ಈತ ಕಣ್ಣಿಗೆ ಸಿಕ್ಕ ಕೃತಿಯನ್ನು ಓದಿ ಅರಗಿಸಿಕೊಳ್ಳುವ ವಾತಾಪಿ, ಈ ಅಪ್ರತಿಮ ಸೃಜನಶೀಲ ಸಾಹಸಿ ಸಾವಿರಾರು ಕೃತಿಗಳನ್ನು ಓದಿರಬಹುದು, ಅಷ್ಟೇ ಸಂಖ್ಯೆಯ ಜಗದ್ವಿಖ್ಯಾತ ಚಲನಚಿತ್ರಗಳನ್ನು ನೋಡಿರಲೂಬಹುದು. ಸದಾ ನೂರಾರು ಗೆಳೆಯರಿಂದ ಅಲಂಕೃತಗೊಂಡಿರುವ ಜೋಗಿ ಸರ್ವಋತು ಸ್ನೇಹಶೀಲ ವ್ಯಕ್ತಿ.

ಈಗ ಜೋಗಿ ಬರಹಗಳಿಗೆ ದಿಕ್ಕೂಚಿಯಾಗುವ 'ಜೋಗಿ ವಾಚಿಕೆ' ಹೊರಬರುತ್ತಿದೆ. ಈ ಜೋಗಿ ಜೋಳಿಗೆಯೊಳಗೆ ನೀವು ಕೈ ಹಾಕಲೇಬೇಕು. ಕನ್ನಡದ ಉತ್ತಮ. ಓದುಗರಲ್ಲಿ ಒಬ್ಬರಾದ ಎನ್ ಸಂಧ್ಯಾರಾಣಿ ಅವರು ಈ ವಾಚಿಕೆಯನ್ನು ಸಂಪಾದಿಸಿದ್ದಾರೆ. ಕನ್ನಡದ ಸತ್ವವನ್ನು ಸರಿಯಾಗಿ ಮೊಗೆದು ಕೊಡುವ ಇವರು ಇಲ್ಲೂ ಯಶಸ್ವಿಯಾಗಿದ್ದಾರೆ.

-ಕುಂವಿ

ಪ್ರಕಾಶಕರು - ಅಂಕಿತ ಪುಸ್ತಕ